d'Leibspeis from VoiKSmund by Fritz Stingl

d'Leibspeis

Stått'n Schnitzi iss' i heit amoi an Kürbis
vegetarisch mei', des wa jå ned so schlecht
gånz besondas måg in, wånn a wengal mürb is
a Bio-Bia dazua zum G'mias, jå des wird recht
Hirsehäppchen gibt’s am Dienståg stått da Stötzn
a Knofözehan gibt’s aso moi zwischendurch
so an Sinneswåndl soid ma glei ausnütz'n
wånns'd ned woast wia's geht, dånn kaufst' da hoid a Buach

Letzt'n Montåg håb i Tofunudl'n gess'n
in da Nåcht då håt's mi netta nuameha blaht
i woas ned wia lång bin i am Heisl g'sess'n
des woan scho Kolik'n, mi hed's boi' åwedraht
Jed'n Såmståg gibt’s a Mandlmus mit Soja
untan ess'n geht da Hunga nima weg
nebenbei is' s'gsunde Fuada gånz sche toja
wer koa Göd ned håt dafia, der frisst in Dreg

owa Kinoa und gepoppta Amarant
måcht mi wieda schlank und elegant
Håfamüli und an Matchatee
måcht mei Haut voi woach und rein und wieda sche
I woaß ned ob de Kost fia mi wås is
wånn i netta nuameha Grås und Wurzl'n friss
dånn is fia d'Viecha nix meha då, de gengan ein
drum ess ich ab und zu ein Schwein

Wånn i schlåf, dånn tram i öfta vo an Bradl
vo an Stäckäkraut mit Knedl und vü Såft
an Hauff'n siasse Såchan hå i in mein Ladl
kånns'd såg'n wås'd wüst a fette Kost de gibt da Kråft
Drum werd' i diesen Sple vo mia nu übadenga
vielleicht bin i fia s'Vegetarische ned baut
Da Nåchba håt 5 Schredl G'söchts im Kölla hänga
sche duachzog'n is' und voi knusprig is de Haut

owa Kinoa und gepoppta Amarant
måcht mi wieda schlank und elegant
Håfamüli und an Matchatee
måcht mei Haut voi woach und rein und wieda sche
I woaß ned ob de Kost fia mi wås is
wånn i netta nuameha Grås und Wurzl'n friss
dånn is fia d'Viecha nix meha då, de gengan ein
drum ess ich ab und zu ein Schwein

• Austropop
• Reggae
• World
• couplet
• mundart
• Austria