Ahanzkinak by Keu Agirretxea

Hitzak

Ahanzkinak


Hartu tarte hilen bat

ta errepara biziei, 

esku artetik ihes

doazen segunduei. 


Inoiz galdetu al duzu

nola deitzen zieten

behin bizia hartu zuten

espazio mortuei? 


Nola gauero

bueltatzen diren

zeru beltzeko

izar galduei? 

Nola ametsen

ehizan hildako

sabel hutseko 

gorputz guztiei?


Hartu tarte hilen bat

ta errepara biziei, 

gurutzatzen zaituzten

seinale iheskorrei. 


Inoiz galdetu al duzu

nola deitzen zieten

hondartzan etzandako

haitz mutilatu hoiei? 


Nola hostoek 

udazkenero

abandonaturiko zuhaitzei? 


Nola hilezkor

sentitzen ziren

gu bezalako 

izaki hauskorrei? 


Nola biluzten garen

ispiluetan? 

Nola maitatzen dugun

gezur gosetan? 

Nola higatzen garen

segunduetan? 

Nola bihurtu ginen

ahanzkinetan? 


Ta nola deitzen

zieten urak

hormetan utzitako zauriei? 


Nola kristalek

euren bidetik

okertutako argi izpiei? 


Nola hostoek

udazkenero

estalitako zoru txatalei?


Nola astiro

hilerrietan

metatzen diren

egunsentiei?

• Alternative
• euskal
• euskal musika
• folk
• pop rock
• rock
• Ondarroa